Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
P. Ovidius Naso · Tristia

Book 3, Poem 8

Text kindly provided by Hypotactic

Vāde salūtātum, subitō perarāta, Perillam,
littera, sermōnis fīda ministra meī.
Aut illam inveniēs dulcī cum mātre sedentem,
aut inter librōs Pīeridāsque suās.
Quicquid aget, cum tē scierit vēnisse, relinquet,
nec mora, quid veniās quidve, requīret, agam.
Vīvere mē dīcēs, sed sīc, ut vīvere nōlim,
nec mala tam longā nostra levāta morā:
et tamen ad Mūsās, quamvīs nocuēre, revertī,
aptaque in alternōs cōgere verba pedēs.
"Tū quoque" dīc "studiīs commūnibus ecquid inhaerēs,
doctaque nōn patriō carmina mōre canis?
Nam tibi cum fātīs mōrēs nātūra pudīcōs
et rārās dōtēs ingeniumque dedit.
Hoc ego Pēgasidās dēdūxī prīmus ad undās,
nē male fēcundae vēna perīret aquae;
prīmus id aspexī tenerīs in virginis annīs,
utque pater nātae duxque comesque fuī.
Ergō sī remanent ignēs tibi pectoris īdem,
sōla tuum vātēs Lesbia vincet opus.
Sed vereor, nē tē mea nunc fortūna retardet,
postque meōs cāsūs sit tibi pectus iners.
Dum licuit, tua saepe mihī, tibi nostra legēbam;
saepe tuī jūdex, saepe magister eram:
aut ego praebēbam factīs modo versibus aurēs,
aut, ubi cessārēs, causa rubōris eram.
Forsitan exemplō, quia mē laesēre libellī,
tū quoque sīs poenae fāta secūta meae.
Pōne, Perilla, metum. Tantummodo fēmina nūlla
nēve vir ā scrīptīs discat amāre tuīs.
Ergō dēsidiae removē, doctissima, causās,
inque bonās artēs et tua sacra redī.
Ista decēns faciēs longīs vitiābitur annīs,
rūgaque in antīquā fronte senīlis erit,
inicietque manum fōrmae damnōsa senectūs,
quae strepitūs passū nōn faciente venit.
Cumque aliquis dīcet "fuit haec fōrmōsa" dolēbis,
et speculum mendāx esse querēre tuum.
Sunt tibi opēs modicae, cum sīs dignissima magnīs:
finge sed inmēnsīs cēnsibus esse parēs,
nempe dat id quodcumque libet fortūna rapitque,
Īrus et est subitō, quī modo Croesus erat.
Singula nē referam, nīl nōn mortāle tenēmus
pectoris exceptīs ingeniīque bonīs.
Ēn ego, cum caream patriā vōbīsque domōque,
raptaque sint, adimī quae potuēre mihi,
ingeniō tamen ipse meō comitorque fruorque:
Caesar in hoc potuit jūris habēre nihil.
Quīlibet hanc saevō vītam mihi fīniat ēnse,
mē tamen extīnctō fāma superstes erit,
dumque suīs victrīx omnem dē montibus orbem
prōspiciet domitum Mārtia Rōma, legar.
Tū quoque, quam studiī maneat fēlīcior ūsus,
effuge ventūrōs, quā potes, usque rogōs!"

Reader settings

Side Panel

Text SizeRelative to your text size
85%

Textual Aids

Touch Navigation