Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
P. Ovidius Naso · Tristia

Book 1, Poem 11

Text kindly provided by Hypotactic

Littera quaecumque est tōtō tibi lēcta libellō,
est mihi sollicitō tempore facta viae.
aut haec mē, gelidō tremerem cum mēnse Decembrī,
scrībentem mediīs Hadria vīdit aquīs;
aut, postquam bimarem cursū superāvimus Isthmon,
alteraque est nostrae sūmpta carīna fugae,
quod facerem versūs inter fera murmura pontī,
Cȳcladas Aegaeās obstipuisse putō.
ipse ego nunc mīror tantīs animīque marisque
flūctibus ingenium nōn cecidisse meum.
seu stupor huic studiō sīve est īnsānia nōmen,
omnis ab hāc cūrā cūra levāta mea est.
saepe ego nimbōsīs dubius jactābar ab Haedīs,
saepe mināx Steropēs sīdere pontus erat,
fuscābatque diem cūstōs Atlantidos Ursae,
aut Hyadas sērīs hauserat Auster aquīs,
saepe maris pars intus erat; tamen ipse trementī
carmina dūcēbam quāliacumque manū.
nunc quoque contentī strīdunt Aquilōne rudentēs,
inque modum cumulī concava surgit aqua.
ipse gubernātor tollēns ad sīdera palmās
exposcit vōtīs, inmemor artis, opem.
quōcumque aspexī, nihil est nisi mortis imāgō,
quam dubiā timeō mente timēnsque precor.
attigerō portum, portū terrēbor ab ipsō:
plūs habet īnfēstā terra timōris aquā;
nam simul īnsidiīs hominum pelagīque labōrō,
et faciunt geminōs ēnsis et unda metūs.
ille meō vereor nē spēret sanguine praedam,
haec titulum nostrae mortis habēre velit.
barbara pars laeva est avidaeque adsuēta rapīnae,
quam cruor et caedēs bellaque semper habent,
cumque sit hībernīs agitātum flūctibus aequor,
pectora sunt ipsō turbidiōra marī.
quō magis hīs dēbēs ignōscere, candide lēctor,
sī spē sunt, ut sunt, īnferiōra tuā.
nōn haec in nostrīs, ut quondam, scrīpsimus hortīs,
nec, cōnsuēte, meum, lectule, corpus habēs.
jactor in indomitō brūmālī lūce profundō
ipsaque caeruleīs charta ferītur aquīs.
improba pugnat hiems indignāturque quod ausim
scrībere sē rigidās incutiente minās.
vincat hiems hominem! sed eōdem tempore, quaesō,
ipse modum statuam carminis, illa suī.

Reader settings

Side Panel

Text SizeRelative to your text size
85%

Textual Aids

Touch Navigation