Frīgora jam Zephyrī minuunt, annōque perāctō
longior antīquīs vīsa Maeōtis hiems,
inpositamque sibī quī nōn bene pertulit Hellēn,
tempora nocturnīs aequa diurna facit.
Jam violam puerīque legunt hilarēsque puellae,
rūstica quae nūllō nāta serente venit;
prātaque pūbēscunt variōrum flōre colōrum,
indocilīque loquāx gutture vernat avis;
utque malae mātris crīmen dēpōnat hirundō
sub trabibus cūnās tēctaque parva facit;
herbaque, quae latuit Cereālibus obruta sulcīs,
exit et expandit molle cacūmen humō;
quōque locō est vītis, dē palmite gemma movētur:
nam procul ā Geticō lītore vītis abest;
quōque locō est arbor, turgēscit in arbore rāmus:
nam procul ā Geticīs fīnibus arbor abest.
Ōtia nunc istīc, jūnctīsque ex ōrdine lūdīs
cēdunt verbōsī garrula bella forī.
ūsus equī nunc est, levibus nunc lūditur armīs,
nunc pila, nunc celerī volvitur orbe trochus;
nunc ubi perfūsa est oleō lābente juventūs,
dēfessōs artūs Virgine tingit aquā.
Scaena viget studiīsque favor distantibus ārdet,
prōque tribus resonant terna theātra forīs.
Ō quantum et quotiēns nōn est numerāre, beātum,
nōn interdictā cui licet urbe fruī!
At mihi sentītur nix vernō sōle solūta,
quaeque lacū dūrae nōn fodiantur aquae:
nec mare concrēscit glaciē, nec, ut ante, per Histrum
strīdula Sauromatēs plaustra bubulcus agit.
Incipient aliquae tamen hūc adnāre carīnae,
hospitaque in Pontī lītore puppis erit.
Sēdulus occurram nautae, dictāque salūte,
quid veniat, quaeram, quisve quibusve locīs.
Ille quidem mīrum nī dē regiōne propinquā
nōn nisi vīcīnās tūtus arārit aquās.
Rārus ab Ītaliā tantum mare nāvita trānsit,
lītora rārus in haec portubus orba venit.
Sīve tamen Graecā scierit, sīve ille Latīnā
vōce loquī (certē grātior hujus erit;
fās quoque ab ōre fretī longaeque Propontidos undīs
hūc aliquem certō vēla dedisse Notō),
quisquis is est, memorī rūmōrem vōce referre
et fierī fāmae parsque gradusque potest.
Is, precor, audītōs possit nārrāre triumphōs
Caesaris et Latiō reddita vōta Jovī,
tēque, rebellātrīx, tandem, Germānia, magnī
trīste caput pedibus supposuisse ducis.
Haec mihi quī referet, quae nōn vīdisse dolēbō,
ille meae domuī prōtinus hospes erit.
Ei mihi, jamne domus Scythicō Nāsōnis in orbe est?
Jamque suum mihi dat prō Lare poena locum?
dī facite ut caesar nōn hīc penetrāle domumque,
hospitium poenae sed velit esse meae.