Ōdī profānum volgus et arceō.
Fāvēte linguīs: carmina nōn prius
audīta Mūsārum sacerdōs
virginibus puerīsque cantō.
Rēgum timendōrum in propriōs gregēs,
rēgēs in ipsōs imperium est Jovis,
clārī Gigantēō triumphō,
cūncta superciliō moventis.
Est ut virō vir lātius ōrdinet
arbusta sulcīs, hic generōsior
dēscendat in campum petītor,
mōribus hic meliorque fāmā
contendat, illī turba clientium
sit major: aequā lēge Necessitās
sortītur īnsignīs et īmōs,
omne capāx movet urna nōmen.
Dēstrictus ēnsis cui super impiā
cervīce pendet, nōn Siculae dapēs
dulcem ēlabōrātum sapōrem,
nōn avium citharaeque cantūs
Somnum redūcent: somnus agrestium
lēnis virōrum nōn humilīs domōs
fastīdit umbrōsamque rīpam,
nōn Zephyrīs agitāta Tempē.
Dēsīderantem quod satis est neque
tūmultuōsum sollicitat mare,
nec saevus Arctūrī cadentis
impetus aut orientis Haedī,
nōn verberātae grandine vīneae
fundusque mendāx, arbore nunc aquās
culpante, nunc torrentia āgrōs
sīdera, nunc hiemēs inīquās.
Contracta piscēs aequora sentiunt
jactīs in altum mōlibus: hūc frequēns
caementa dēmittit redēmptor
cum famulīs dominusque terrae
fastīdiōsus: sed Timor et Minae
scandunt eōdem quō dominus, neque
dēcēdit aerātā trirēmī et
post equitem sedet ātra Cūra.
Quod sī dolentem nec Phrygius lapis
nec purpurārum sīdere clārior
dēlēnit ūsus nec Falerna
vītis Achaemeniumque costum,
cūr invidendīs postibus et novō
sublīme rītū mōliar ātrium?
Cūr valle permūtem Sabīnā
dīvitiās operōsiōrēs?