Tū nē quaesierīs (scīre nefās) quem mihi, quem tibī
fīnem dī dederint, Leuconoē, nec Babylōniōs
temptārīs numerōs. Ut melius quicquid erit patī!
Seu plūrīs hiemēs seu tribuit Juppiter ultimam,
quae nunc oppositīs dēbilitat pūmicibus mare
Tyrrhēnum, sapiās, vīna liquēs et spatiō brevī
spem longam resecēs. Dum loquimur, fūgerit invida
aetās: carpe diem, quam minimum crēdula posterō.