Dīānam tenerae dīcite virginēs,
intōnsum, puerī, dīcite Cynthium
Lātōnamque suprēmō
dīlēctam penitus Jovī;
vōs laetam fluviīs et nemorum comā,
quaecumque aut gelidō prōminet Algidō,
nīgrīs aut Erymanthī
silvīs aut viridis Gragī;
vōs Tempē totidem tollite laudibus
nātālemque, marēs, Dēlon Apollinis
īnsignemque pharētrā
frāternāque umerum lyrā.
Hic bellum lacrimōsum, hic miseram famem
pestemque ā populō et prīncipe Caesare in
Persās atque Britannōs
vestrā mōtus aget prece.