Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Statius · Silvae

Book 4, Poem 8

Text kindly provided by Hypotactic

Pande forēs superum vittātaque templa Sabaeīs
nūbibus et pecudum fibrīs spīrantibus implē,
Parthenopē; clārī genus ecce Menecratis auget
tertia jam subolēs. procerum tibi nōbile vulgus
crēscit et īnsānī sōlātur damna Vesēvī.
nec sōlum fēstās sēcrēta Neāpolis ārās
ambiat: et sociī portūs dīlēctaque mītī
terra Dicarchēō nec nōn plaga cāra madentī
Surrentīna deō sertīs altāria cingat,
māternī quā lītus avī, quem turba nepōtum
circumit et similēs contendit reddere vultūs.
gaudeat et Libycā praesignis avunculus hastā,
quaeque sibī genitōs putat attollitque benignō
Polla sinū. mactē, ō juvenis, quī tanta merentī
lūmina dās patriae. dulcēs tremit ecce tumultūs
tot dominīs clāmāta domus. procul ātra recēdat
Invidia atque aliō līventia pectora flectat:
hīs senium longaeque decus virtūtis et alba
Ātropos et patrius laurōs prōmīsit Apollō.
ergo quod Ausoniae pater augustissimus urbis
jūs tibi tergeminae dederat laetābile prōlis,
ōmen erat. vēnit totiēns Lūcīna piumque
intrāvit repetīta larem. sīc fertilis, ōrō,
stet domus et dōnīs numquam mūtāta sacrātīs.
macte, quod et prōlēs tibi saepius aucta virīlī
rōbore, sed juvenī laetanda et virgo parentī:
aptior hīs virtūs, citius dabit illa nepōtēs,
quālis māternīs Helenē jam digna palaestrīs
inter Amyclaeōs reptābat candida frātrēs;
vel quālis caelī faciēs, ubi nocte serēnā
admōvēre jubar mediae duo sīdera lūnae.
Sed queror haud facilēs, juvenum rārissime, questūs
īrāscorque etiam, quantum īrāscuntur amantēs.
tantane mē decuit vulgārī gaudia fāmā
nōscere? cumque tibī vāgīret tertius īnfāns,
prōtinus ingentī nōn vēnit nūntia cursū
littera, quae fēstōs cumulāre altāribus ignēs
et redimīre chelyn postēsque ōrnāre jubēret
Albānōque cadum sordentem prōmere fūmō
et cantū signāre diem? sed tardus inersque
nunc dēmum mea vōta canō: tua culpa tuusque
hic pudor. ulterius sed enim prōdūcere questūs
nōn licet; ēn hilaris circumstat turba tuōrum
dēfēnsatque patrem. quem nōn hōc agmine vincās?
dī patriī, quōs auguriīs super aequora magnīs
lītus ad Ausonium dēvēxit Abantia classis,
tū, ductor populī longē migrantis, Apollō,
cujus adhūc volucrem laevā cervīce sedentem
respiciēns blandē fēlīx Eumēlus adōrat,
tūque, Actaea Cerēs, cursū cui semper anhēlō
vōtīvam tacitī quassāmus lampada mystae,
et vōs, Tyndaridae, quōs nōn horrenda Lycūrgī
Tāygeta umbrōsaeque magis coluēre Therapnae:
hōs cum plēbe suā patriī servāte penātēs.
sint, quī fessam aevō crēbrīsque labōribus urbem
vōce opibusque juvent viridīque in nōmine servent.
hīs placidōs genitor mōrēs largumque nitōrem
mōnstret avus, pulchrae studium virtūtis uterque.
quippe et opēs et orīgo sinunt hanc lampade prīmā
patriciās intrāre forēs, hōs pūbe sub ipsā,
sī modo prōna bonīs invictī Caesaris adsint
nūmina, Rōmuleī līmen pulsāre senātūs.

Reader settings

Side Panel

Text SizeRelative to your text size
85%

Textual Aids

Touch Navigation