Quae superinpositō mōlēs gemināta colossō
stat Latium complexa forum? caelōne perāctum
flūxit opus? Siculīs an cōnfōrmāta camīnīs
effigiēs lassum Steropem Brontemque relīquit?
an tē Palladiae tālem, Germānice, nōbīs
effēcēre manūs, quālem modo frēna tenentem
Rhēnus et attonitī vīdit domus ardua Dācī?
nunc age Fāma prior nōtum per saecula nōmen
Dardaniī mīrētur equī cui vertice sacrō
Dindymon et caesīs dēcrēvit frondibus Īdē:
hunc neque discissīs cēpissent Pergama mūrīs,
nec grege permixtō puerī innūptaeque puellae
ipse nec Aenēās nec magnus dūceret Hector.
adde quod ille nocēns saevōsque amplexus Achīvōs,
hunc mītis commendat eques: juvat ōra tuērī
mixta notīs bellī placidamque gerentia pācem.
Nec vērīs majōra putēs: pār fōrma decorque,
pār honor. exhaustīs Mārtem nōn altius armīs
Bistonius portat sonipēs magnōque superbit
pondere, nec tardō raptus prope flūmina cursū
fūmat et ingentī prōpellit Strȳmona flātū.
pār operī sēdēs. hinc obvia līmina pandit
quī fessus bellīs adsertae mūnere prōlis
prīmus iter nostrīs ostendit in aethera dīvīs;
discit et ē vultū quantum tū mītior armīs,
quī nec in externōs facilis saevīre furōrēs
dās Cattīs Dācīsque fidem: tē signa ferente
et minor in lēgēs īret gener et Cato castrīs.
at laterum passūs hinc Jūlia tēcta tuentur,
illinc belligerī sublīmis rēgia Paulī,
terga pater blandōque videt Concordia vultū.
ipse autem pūrō celsum caput āere saeptus
templa superfulgēs et prōspectāre vidēris,
an nova contemptīs surgant Pālātia flammīs
pulchrius, an tacitā vigilet face Trōicus ignis
atque explōrātās jam laudet Vesta ministrās.
Dextra vetat pugnās, laevam Trītōnia virgō
nōn gravat et sectae praetendit colla Medūsae.
ceu stimulīs accendit equum, nec dulcior usquam
lēcta deae sēdēs, nec sī, Pater, ipse tenērēs.
pectora, quae mundī valeant ēvolvere cūrās
et quīs sē tōtīs Temesē dedit hausta metallīs.
it tergō dēmissa chlamys, latus ēnse quiētō
sēcūrum, magnus quantō mucrōne minātur
noctibus hībernīs et sīdera terret Orīōn.
At sonipēs habitūs animōsque imitātus equestrēs
ācrius attollit vultūs cursumque minātur;
cui rigidīs stant colla jubīs vīvusque per armōs
impetus, et tantīs calcāribus īlia lātē
suffectūra patent. vacuae prō cespite terrae
aerea captīvī crīnem tegit ungula Rhēnī.
hunc et Adrastēus vīsum extimuisset Arīōn,
et pavet aspiciēns Lēdaeus ab aede propinquā
Cyllarus: hic dominī numquam mūtābit habēnās
perpetuus frēnīs atque ūnī serviet astrō.
Vix sola sufficiunt īnsessaque pondere tōtō
subter anhēlat humus, nec ferrō aut aere: labōrant
sub geniō, teneat quamvīs aeterna crepīdō,
quae superingestī portāret culmina montis
caeliferīque attrīta genū dūrāsset Atlantis.
Nec longae trāxēre morae. juvat ipsa labōrēs
fōrma deī praesēns, operīque intenta juventūs
mīrātur plūs posse manūs. strepit ardua pulsū
māchina; continuus septem per culmina ventīs
it fragor et magnae fīgit vaga murmura Rōmae.
Ipse locī cūstōs, cujus sacrāta vorāgō
fāmōsīque lacūs nōmen memorābile servant,
innumerōs aeris sonitūs et verbere crūdō
ut sēnsit mūgīre forum, movet horrida sānctō
ōra sitū meritāque caput venerābile quercū.
ac prīmum ingentēs habitūs lūcemque coruscam
expāvit majōris equī terque ardua mersit
colla lacū trepidāns, laetus mox praeside vīsō:
'salvē, magnōrum prōlēs genitorque deōrum,
audītum longē nūmen mihi! nunc mea fēlīx,
nunc veneranda palūs, cum tē prope nōsse tuumque
immortāle jubar vīcīnā sēde tuērī
concessum. semel auctor ego inventorque salūtis
Rōmuleae: tū bella Jovis, tū proelia Rhēnī,
tū cīvīle nefās, tū tardum in foedera montem
longō Mārte domās. quod sī tē nostra tulissent
saecula, temptāssēs mē nōn audente profundō
īre lacū, set Rōma tuās tenuisset habēnās.'
Cēdat equus Latiae quī contrā templa Diōnēs
Caesareī stat sēde forī quem trāderis ausus
Pellaeō, Lȳsippe, ducī; mox Caesaris ōra
mīrātā cervīce tulit: vix lūmine fessō
explōrēs quam longus in hunc dēspectus ab illō.
quis rudis usque adeō quī nōn, ut vīderit ambōs,
tantum dīcat equōs quantum distāre regentēs?
Nōn hoc imbriferās hiemēs opus aut Jovis ignem
tergeminum, Aeoliī nōn agmina carceris horret
annōrumve morās: stābit, dum terra polusque,
dum Rōmāna diēs. hūc et sub nocte silentī,
cum superīs terrēna placent, tua turba relictō
lābētur caelō miscēbitque ōscula juxtā.
ībit in amplexūs nātus frāterque paterque
et soror: ūna locum cervīx dabit omnibus astrīs.
Ūtere perpetuum populī magnīque senātūs
mūnere. Apellēae cuperent tē scrībere cērae,
optāssetque novō similem tē pōnere templō
Atticus Ēlēī senior Jovis, et tua mītis
ōra Tarāns, tua sīdereās imitantia flammās
lūmina contemptō māllet Rhodos aspera Phoebō.
certus amēs terrās et quae tibi templa dicāmus.
ipse colās; nec tē caelī juvet aula, tuōsque
laetus huic dōnō videās dare tūra nepōtēs.