Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Statius · Silvae

Book 4, Poem 1

Text kindly provided by Hypotactic

Laeta bis octōnīs accēdit purpura fāstīs
Caesaris īnsignemque aperit Germānicus annum,
atque oritur cum sōle novō, cum grandibus astrīs
clārius ipse nitēns et prīmō major Eōō.
exsultent lēgēs Latiae, gaudēte, curūlēs,
et septemgeminō jactantior aethera pulset
Rōma jugō, plūsque ante aliās Euandrius arcēs
collis ovet: subiēre novī Palātia fascēs
et requiem bis sextus honōs precibusque receptīs
cūria Caesareum gaudet vīcisse pudōrem.
ipse etiam immēnsī reparātor maximus aevī
attollit vultūs et utrōque ā līmine grātēs
Jānus agit, quem tū vīcīnā Pāce ligātum
omnia jussistī compōnere bella novīque
in lēgēs jūrāre forī. levat ecce supīnās
hinc atque inde manūs gemināque haec vōce profātur:
'salvē, magne parēns mundī, quī saecula mēcum
īnstaurāre parās, tālem tē cernere semper
mēnse meō tua Rōma cupit; sīc tempora nāscī,
sīc annōs intrāre decet. dā gaudia fāstīs
continua; hōs umerōs multō sinus ambiat ostrō
et properāta tuae manibus praetexta Minervae.
aspicis ut templīs alius nitor, altior ārīs
ignis et ipsa meae tepeant tibi sīdera brūmae,
mōribus atque tuīs gaudent turmaeque tribūsque
purpureīque patrēs, lūcemque ā cōnsule dūcit
omnis honōs. quid tāle, precor, prior annus habēbat?
dīc age, Rōma potēns, et mēcum, longa Vetustās,
dīnumerā fāstōs nec parva exempla recēnsē,
sed quae sōla meus dignētur vincere Caesar.
ter Latiō deciēsque tulit lābentibus annīs
Augustus fascēs, sed coepit sēro merērī:
tū juvenis praegressus avōs. et quanta recūsās,
quanta vetās! flectēre tamen precibusque senātūs
permittēs hunc saepe diem. manet īnsuper ōrdō
longior, et totidem fēlīx tibi Rōma curūlēs
terque quaterque dabit. mēcum altera saecula condēs,
et tibi longaevī renovābitur āra parentis;
mīlle tropaea ferēs, tantum permitte triumphōs.
restat Bactra novīs, restat Babylōna tribūtīs
frēnārī; nōndum gremiō Jovis Indica laurus,
nōndum Arabēs Sērēsque rogant, nōndum omnis honōrem
annus habet, cupiuntque decem tua nōmina mēnsēs.'
Sīc Jānus, clausōque libēns sē poste recēpit.
tunc omnēs patuēre deī laetōque dedērunt
signa polō, longamque tibī rēx, magne, juventam
annuit atque suōs prōmīsit Juppiter annōs.

Reader settings

Side Panel

Text SizeRelative to your text size
85%

Textual Aids

Touch Navigation