aureos millenos et centena pondo argenti, sortes sane convivales scriptas in coclearibus habuit tales ut alius exierit “decem camelos,” alius “decem muscas,” alius “decem libras auri,” alius “decem plumbi,” alius “decem struthiones,” alius “decem ova pullina,” ut
vere sortes essent et fata temptarentur. quod quidem et ludis suis exhibuit, cum et ursos decem et decem glires et decem lactucas et decem auri libras in sorte habuit, primusque hunc morem sortis instituit
quem nunc videmus. sed vere ad sortem scaenicos vocavit, cum et canes mortuos et libram bubulae carnis haberet in sorte et item centum aureos et mille argenteos et centum folles aeris et
alia talia, quae populus tam libenter accepit, ut eum postea imperare gratularentur.