Quam nisi tū dederis, caritūra est ipsa, salūtem
mittit Amāzoniō Cressa puella virō.
perlege, quodcumque est: quid epistula lēcta nocēbit?
tē quoque in hāc aliquid quod juvet esse potest;
hīs arcāna notīs terrā pelagōque feruntur.
īnspicit acceptās hostis ab hoste notās.
Ter tēcum cōnāta loquī ter inūtilis haesit
lingua, ter in prīmō restitit ōre sonus.
quā licet et sequitur, pudor est miscendus amōrī;
dīcere quae puduit, scrībere jussit amor.
quidquid Amor jussit, nōn est contemnere tūtum;
rēgnat et in dominōs jūs habet ille deōs.
ille mihī prīmō dubitantī scrībere dīxit:
'scrībe! dabit victās ferreus ille manūs.'
adsit et, ut nostrās avidō fovet igne medullās,
fīgat sīc animōs in mea vōta tuōs!
Nōn ego nēquitiā sociālia foedera rumpam;
fāma (velim quaerās) crīmine nostra vacat.
vēnit amor gravius, quō sērius: ūrimur intus;
ūrimur, et caecum pectora vulnus habent.
scīlicet ut tenerōs laedunt juga prīma juvencōs,
frēnaque vix patitur dē grege captus equus,
sīc male vixque subit prīmōs rude pectus amōrēs,
sarcinaque haec animō nōn sedet apta meō.
ars fit, ubi ā tenerīs crīmen condiscitur annīs;
cui venit exāctō tempore, pejus amat.
tū nova servātae capiēs lībāmina fāmae,
et pariter nostrum fīet uterque nocēns.
est aliquid, plēnīs pōmāria carpere rāmīs,
et tenuī prīmam dēlegere ungue rosam.
sī tamen ille prior, quō mē sine crīmine gessī,
candor ab īnsolitā lābe notandus erat,
at bene successit, dignō quod adūrimur ignī;
pejus adulteriō turpis adulter obest.
sī mihi concēdat Jūnō frātremque virumque,
Hippolytum videor praepositūra Jovī!
Jam quoque (vix crēdēs) ignōtās mittor in artēs;
est mihi per saevās impetus īre ferās.
jam mihi prīma dea est arcū praesignis aduncō
Dēlia; jūdicium subsequor ipsa tuum.
in nemus īre libet pressīsque in rētia cervīs
hortārī celerīs per juga summa canēs,
aut tremulum excussō jaculum vibrāre lacertō,
aut in grāmineā pōnere corpus humō.
saepe juvat versāre levēs in pulvere currūs
torquentem frēnīs ōra fugācis equī;
nunc feror, ut Bacchī furiīs Elelēides āctae,
quaeque sub Īdaeō tympana colle movent,
aut quās sēmideae Dryades Faunīque bicornēs
nūmine contāctās attonuēre suō.
namque mihī referunt, cum sē furor ille remīsit,
omnia; mē tacitam cōnscius ūrit amor.
Forsitan hunc generis fātō reddāmus amōrem,
et Venus ex tōtā gente tribūta petat.
Juppiter Eurōpēn (prīma est ea gentis orīgō)
dīlēxit, taurō dissimulante deum.
Pāsiphaē māter, dēceptō subdita taurō,
ēnīxa est uterō crīmen onusque suō.
perfidus Aegīdēs, dūcentia fīla secūtus,
curva meae fūgit tēcta sorōris ope.
ēn, ego nunc, nē forte parum Mīnōia crēdar,
in sociās lēgēs ultima gentis eō!
hoc quoque fātāle est: placuit domus ūna duābus;
mē tua fōrma capit, capta parente soror.
Thēsīdēs Thēseusque duās rapuēre sorōrēs:
pōnite dē nostrā bīna tropaea domō!
Tempore quō nōbīs inita est Cereālis Eleusin,
Gnōsia mē vellem dētinuisset humus!
tunc mihi praecipuē (nec nōn tamen ante placēbās)
ācer in extrēmīs ossibus haesit amor.
candida vestis erat, praecīnctī flōre capillī,
flāva verēcundus tīnxerat ōra rubor,
quemque vocant aliae vultum rigidumque trucemque,
prō rigidō Phaedrā jūdice fortis erat.
sint procul ā nōbīs juvenēs ut fēmina cōmptī!
fīne colī modicō fōrma virīlis amat.
tē tuus iste rigor positīque sine arte capillī
et levis ēgregiō pulvis in ōre decet.
sīve ferōcis equī luctantia colla recurvās,
exiguō flexōs mīror in orbe pedēs;
seu lentum validō torquēs hastīle lacertō,
ōra ferōx in sē versa lacertus habet,
sīve tenēs lātō vēnābula cornea ferrō.
dēnique nostra juvat lūmina, quidquid agis.
Tū modo dūritiam silvīs dēpōne jugōsīs;
nōn sum mīlitiā digna perīre tuā.
quid juvat incīnctae studia exercēre Diānae,
et Venerī numerōs ēripuisse suōs?
quod caret alternā requiē, dūrābile nōn est;
haec reparat vīrēs fessaque membra novat.
arcus (et arma tuae tibi sunt imitanda Diānae)
sī numquam cessēs tendere, mollis erit.
clārus erat silvīs Cephalus, multaeque per herbās
conciderant illō percutiente ferae;
nec tamen Aurōrae male sē praebēbat amandum.
ībat ad hunc sapiēns ā sene dīva virō.
saepe sub īlicibus Venerem Cinyrāque creātum
sustinuit positōs quaelibet herba duōs.
ārsit et Oenīdēs in Maenaliā Atalantā;
illa ferae spolium pignus amōris habet.
nōs quoque quam prīmum turbā numerēmur in ista!
sī Venerem tollās, rūstica silva tua est.
ipsa comes veniam, nec mē latebrōsa movēbunt
saxa neque oblīquō dente timendus aper.
Aequora bīna suīs obpugnant flūctibus isthmon,
et tenuis tellūs audit utrumque mare.
hīc tēcum Troezēna colam, Pitthēia rēgna;
jam nunc est patriā cārior illa meā.
tempore abest aberitque diū Neptūnius hērōs;
illum Pīrithoī dētinet ōra suī.
praeposuit Thēseus (nisi sī manifēsta negāmus)
Pīrithoum Phaedrae Pīrithoumque tibi.
sōla nec haec ad nōs injūria vēnit ab illō;
in magnīs laesī rēbus uterque sumus.
ossa meī frātris clāvā perfrācta trinōdī
sparsit humī; soror est praeda relicta ferīs.
prīma secūrigerās inter virtūte puellās
tē peperit, nātī digna vigōre parēns;
sī quaerās, ubi sit: Thēseus latus ēnse perēgit,
nec tantō māter pignore tūta fuit.
at nē nūpta quidem taedāque accepta jugālī:
cūr, nisi nē caperēs rēgna paterna nothus?
addidit et frātrēs ex mē tibi, quōs tamen omnīs
nōn ego tollendī causa, sed ille fuit.
ō utinam nocitūra tibī, pulcherrime rērum,
in mediō nīsū vīscera rupta forent!
ī nunc, sīc meritī lectum reverēre parentis:
quem fugit et factīs abdicat ipse suīs!
Nec, quia prīvignō videar coitūra noverca,
terruerint animōs nōmina vāna tuōs.
ista vetus pietās, aevō moritūra futūrō,
rūstica Sāturnō rēgna tenente fuit.
Juppiter esse pium statuit, quodcumque juvāret,
et fās omne facit frātre marīta soror.
illa coit firmā generis jūnctūra catēnā,
inposuit nōdōs cui Venus ipsa suōs.
nec labor est cēlāre, licet peccēmus, amōrem.
cognātō poterit nōmine culpa tegī.
vīderit amplexōs aliquis, laudābimur ambō;
dīcar prīvignō fīda noverca meō.
nōn tibi per tenebrās dūrī reseranda marītī
jānua, nōn cūstōs dēcipiendus erit;
ut tenuit domus ūna duōs, domus ūna tenēbit;
ōscula aperta dabās, ōscula aperta dabis;
tūtus eris mēcum laudemque merēbere culpā,
tū licet in lectō cōnspiciāre meō.
tolle morās tantum properātaque foedera junge:
quī mihi nunc saevit, sīc tibi parcat Amor!
nōn ego dēdignor supplex humilisque precārī.
heu! ubi nunc fastūs altaque verba jacent?
et pugnāre diū nec mē submittere culpae
certa fuī certī sīquid habēret amor;
victa precor genibusque tuīs rēgālia tendō
bracchia! quid deceat, nōn videt ūllus amāns.
dēpuduī, profugusque pudor sua signa relīquit.
Dā veniam fassae dūraque corda domā!
quod mihi sit genitor, quī possidet aequora, Mīnōs,
quod veniant proavī fulmina torta manū,
quod sit avus radiīs frontem vāllātus acūtīs,
purpureō tepidum quī movet axe diem:
nōbilitās sub amōre jacet! miserēre priōrum
et, mihi sī nōn vīs parcere, parce meīs!
est mihi dōtālis tellūs Jovis īnsula, Crētē:
serviat Hippolytō rēgia tōta meō!
Flecte, ferōx, animōs! potuit corrumpere taurum
māter; eris taurō saevior ipse trucī?
per Venerem, parcās, ōrō, quae plūrima mēcum est!
sīc numquam, quae tē spernere possit, amēs;
sīc tibi sēcrētīs agilis dea saltibus adsit,
silvaque perdendās praebeat alta ferās;
sīc faveant Satyrī montānaque nūmina Pānes,
et cadat adversā cuspide fossus aper;
sīc tibi dent Nymphae, quamvīs ōdisse puellās
dīceris, ārentem quae levet unda sitim!
Addimus hīs precibus lacrimās quoque; verba precantis
quī legis, et lacrimās finge vidēre meās!