III.
Ut omne holus smaragdinum fiat: omne holus smaragdinum fiet, si cum nitro coquatur.
Pulmentarium adventrem: betas minutas et porros requietos elixabis, in patena conpones. teres piper, ciminum, suffundes liquamen, passum, ut quaedam dulcedo sit. facias ut ferveat, cum fervuerit, inferes. similiter polipodium in tepidam mittes, ubi mollierit, rades et minutum cum pipere et cimino tritum in patenam ferventem mittes et uteris.
Aliter ad ventrem: faeces betaciorum facies detergi, ne laves, in eos in medium nigrum asparges et alligas, singulos fasces mittes, in aequam cum coxeris, condies patenam, cum eadem passum vel caroenum et ciminum desuper asparges et oleum modicum. ubi fervuerit, polipodium et frustra nucum cum liquamine teres, ferventem in patenam fundes, coperies. statim depones et uteris.
Aliter betacios varrones. Varro: ,,betacios sed nigros [quorum detersas radices], ex mulso decoctos cum sale modico et oleo, vel sale qua et oleo in se cocto iusculum facere et potare". melius etiam, si in eo pullus sit decoctus.
Aliter ad ventrem: apios virides cum suis radicibus lavabis et siccabis ad solem, deinde albamen [capita] porrorum simul elixabis in caccabo novo ita ut aqua ad tertias deferveat [id est ex tribus eminis aquae una remaneat]. postea teres piper, liquamen et aliquantum mellis umorem, temperabis et aquam apiorum decoctorum colabis in mortario et superfundes apio. cum semel fervuerit, abpones, et si libitum fuerit, apios adicies.
Asparagos. asparagos cucabis, rursum in calidam summittes, callosiores reddes.
Cucurbitas. ad iustum cucurbitas coctas expressas in patena conpones. adicies in mortarium piper et ciminum, silfi modice [id est lasaris radicem], rutam modicam, liquamine et aceto temperabis, mittes defrictum modicum ut coloretur. ius exinanies in patena. cum fervuerit iterum ac tertio, depones et piper minutum asparges.
Aliter cucurbitas iure colocasiorum: cucurbitas coques ex aequa in modum colocasiorum. teres piper, ciminum, rutam, suffundes acetum, liquamen, temperabis. in caccabum. cui adicies et eas cucurbitas incisas expressas. in ius mittes ut ferveant. amolo obligas, piper aspargis et inferes.
Cucurbitas more alexandrino: elixatas cucurbitas exprimes, sale asparges, in patena conpones. teres piper, ciminum, coriandri semen, mentam viridem, lasaris radicem, suffundes acetum, adicies cariotam, nucleum teres melle, acetum, liquamen, defricto et oleum, temperabis et cucurbitas perfundes. cum fervuerint, piper aspargis et inferes.
Aliter cucurbitas: et elixatas ex liquamine, oleo, mero.
Aliter cucurbitas: frictas oenogaro simplici, et pipere.
Aliter cucurbitas: elixatas et frictas in patena conpones, ciminatum superfundes, modico oleo super adiecto fervere facias et interes.
Aliter cucurbitas frictas: tritum piper, ligisticum, ciminum, origanum, cepam, vinum, liquamen et oleum. amolo obligabis, in patena et inferes.
Aliter cucurbitas cum gallina: duracina, tubera, piper, careum, ciminum, silfi, condimenta viridia mentam, apium, coriandrum, puleium, cariotam, mel, vinum, liquamen, oleum, acetum.
Citrium: sil montanum, silfi, mentam siccam, acetum, liquamen.
Cucumeres: cucumeres rasos sive ex liquamine sive ex oenogaro. sine ructu et gravitudine et teneriores senties.
Aliter cucumeres: rasos elixabis cum cerebellis elixis, cimino et melle, modico api semen, liquamine et oleo, ovis obligabis. piper aspargis et inferes.
Aliter cucumeres: piper, puleium, mel vel passum, liquamen et acetum, interdum et silfi accedit.
Pepones et melones: piper, puleium, mel vel passum, liquamen, acetum, interdum et silfl accedit.
Malvas: malvas minores de grano ex liquamine et oleo, acetum. malvas maiores in eo grano, piper ex liquamine, caroeno vel passo.
Cimas et coliclos. cimas: ciminum, salem, vinum vetus, et oleum si voles [addes], piper, ligisticum, mentam, rutam, coriandrum [folia coliclorum], liquamen, vinum, oleum.
Aliter: coliclos elixatos mediabis, summam foliorum seres cum coriandro, cepa, cimino, pipere, passo vel caroeno et oleo modico.
Aliter: colicli assati in patena conpositi condiuntur liquamine, oleo, mero, cucino. super asparges porrum, ciminum, coriandrum viride super concides.
Aliter: colicli conditi ut supra cum elixis porris coquantur.
Aliter: coliclos condies ut supra, admisces olivas virides et semel ferveant
Aliter coliclos: conditis ut supra superfundis alicam elixam cum nucleis et uva passa, super asparges porros.
Porros. porros maturos fieri pugnum salis, aquam et oleum mixtum facies et ibi coques et eximes. cum oleo, liquamine, mero et inferes.
Aliter: porros operias foliis coliclorum et in prunis coques, ut supra et inferes.
Aliter: porros in bafa coctos ut supra et inferes.
Aliter porros: si in aequam elixati erunt, bafae nondum conditae plurimum admisce conditurae in qua eos manducaturus es.
Betas: concides, porrum, coriandrum, ciminium, uvam passam varianam, et omnia in medulam mittes, ligabis et ita inferes ex liquamine, oleo, aceto.
Aliter betas elixas: ex senapi, oleo modico et aceto bene inferuntur.
Holisera. holisera in fasciculum redacta manu ex liquamine, oleo et mero bene inferuntur, vel cum piscibus assis.
Rapas sive napos: rapas sive napos elixatos exprimes. deinde teres ciminum plurimum, rutam, minus lasar particum vel acetum, liquamen, defrictum et oleum modice. fervere facies et inferes.
Aliter: rapas sive napos elixas inferes, oleum subinstillabis, si voles, acetum adde.
Rafanos: rafanos cum piperato, ita ut piper cum liquamine teras.
Holus molle. holus molle ex holisatro: coctum ex aqua nitrata expressum concides minutim. teres piper, ligisticum, satureiam siccam cum cepa sicca, liquamen, oleum et vinum.
Aliter holus molle: apium coques ex aqua nitrata, exprimes et concides minutim. in mortario teres piper, ligisticum, origanum, cepam, vinum, liquamen et oleum. coques in pultario et sic apium conmisces.
Aliter holus molle ex foliis lactucarum cum scapis: coques ex aqua nitrata, expressa concides minutim. in mortario teres piper, ligisticum, api semen, mentam siccam, cepam, liquamen, oleum, vinum.
Holus molle ne acescat, summa quaeque amputantur et purgamenta et caules madefactos in aqua absenti contegito.
Herbae rusticae liquamine, oleo, aceto a manu, vel in patena pipere, cimino, bacis lentisci.
Urticae: urticam feminam Sole in Ariete posito adversus aegritudinem sumes, si voles.
Intuba et lactucae: intuba ex liquamine, oleo modico comedere cepa concisa pro flaturis verno, hieme intuba ex enbambate vel melle et aceto acri.
Lactucas cum oxiporio, aceto et modico liquamine ad digestionem et in flationem.
Et ne lactucae laedant: cimini unc. II. gingiberis unc. I. rutae viridis unc. I. dactilorum pinguium scripulos XII. piperis unc. I. mellis unc. VIIII. ciminum autem aethiopicum aut siriacum aut libicum infundes in aceto, cum siccaverit, tundes. et postea melle omnia conprehendis, cum necesse fuerit. dimidium cocleare cum liquamine et aceto modico misces. aut post cenam dimidium cocleare accipies.
Carduos liquamine, oleo et ovis concisis. Aliter carduos: rutam, mentam, coriandrum, feniculum omnia viridia teres, addes piper, ligisticum, mel, liquamen et oleum. Aliter carduos elixos: piper, ciminum, liquamen et oleum.
Sfondili vel funguli: sfondili fricti ex oenogaro simplici. Aliter: sfondili elixi ex sale, oleo, mero, coriandro viridi conciso et pipere integro.
Aliter: sfondilos elixos perfundes amolato infra scripto: api semen, rutam vel piper teres, passum, liquamen et oleum modice; amolo obligas. piper aspargis et inferes.
Aliter: sfondilos tores. ciminum, rutam, liquamen, caroenum modice, coriandrum viride, et porrum. Et sfondilos infares pro salsa.
Aliter: sfondilos elixatos praedurabis, mittes in caccabum oleum, liquamen, piper, passum, colorabis et obligas.
Aliter: sfondilos oleo, liquamine conplebis, vel oleo et sale assabis, piper aspargis et inferes.
[Aliter: sfondilos elixatos conteres et nervos eorum eximes, deinde cum eis alicam elixatam et ova conteres, liquamen, piper. isicia ex his facies cum nucleis et pipere. in augmento. assabis. oenogaro continges. et pro isiciis inferes.]
Carotae seu pastinacae. carotae seu pastinacae frictae oenogaro inferuntur.
Aliter: carotas sale, oleo puro et aceto.
Aliter: carotas elixatas concisas ex ciminato, oleo modico coques et inferes. ciminatum colorium facies. Incipit Apici Caeli pandectes.