II.
Isicia fiunt marina de cammaris et astacis, de lolligine, de sepia, de locusta. isicium condies pipere, ligistico, cimino, lasaris radice.
Isicia de lolligine: sublatis crinibus in fulmento tundes, sicuti assolet, pulpa et in mortario et in liquamine diligenter friatur et exinde isicia plassantur.
Isicia de squillis vel de cammaris amplis: cammari vel squillae de testa sua eximuntur et in mortario teruntur cum pipere et liquamine optimo. pulpa isicia plassantur.
Omentata ita fiunt: assas iocur porcinum et eum enervas. ante tamen teras piper, rutam, liquamen et sic supermittis iocur et teres et misces, sicut pulpa omento ita et singula involvuntur folia lauri. et ad fumum suspenduntur quamdiu voles. cum manducare volueris, tolles de fumo et denuo assas.
Et sicium: adicies in mortarium piper, ligisticum, origanum, fricabis, suffundes liquamen, adicies cerebella cocta — teres diligenter, ne astulas habeant — adicies ova quinque. et dissolves diligenter, ut unum corpus efficias, liquamine temperas et in patella aenea exinanies, coques. cum coctum fuerit, versas in tabulam mundam, tessalas concides. Adicies in mortarium piper, ligisticum, origanum, fricabis in se, conmisces. in caccabum. facies ut ferveat. cum fervuerit, tractum confringes, obligas. coagitabis et exinanies in boletari. piper aspargis et appones.
Isicia ex sfondilis: elixatos sfondilos conteres et nervos eorum eximes, deinde cum eis alicam elixatam, ova conteres, pipere. in omento. assabis oenogaro perfundes. et pro isiciis inferes.
Isicia omentata: pulpam concisam teres, cum medula siligine, in vineo infusu piper, liquamen, si velis et bacam mirtae extemperatam simul conteres. pusilla isicia formabis intus nucleis et pipere positis, involuta omento subassabis, cum garoeno.
Isicia plena: accipies adipes fasiani recentes, praeduras et facis ex eo tessalas, cum pipere, liquamine, caroeno. in isicio includes, ex hidrogaro coques et inferes.
Hidrogarata isicia sic facies: teres piper, ligisticum, piretrum minimum, suffundes liquamen, aquam cisterninam dum conducet, exinanies in caccabo et cum isicio ad vaporem ignis pones et caleat et sic surbendum inferes.
In isicia de pullo: olei floris lib. I. liquaminis quartarium, piperis semunciam.
Aliter de pullo: piperis grana XXXI. conteres, mittis liquaminis optimi calicem, caroeni dum locum habent de fasianis, item tertium lotantundem, aquae VI. mitis et ad vaporem ignis pones.
Isicium simplex: ad unum liquaminis acetabulum aquae septem mittes, modicum api viridis, triti piperis cocleare. isiciola concoques. et si ad ventrem solvendum dabis, hidrogaro feces conditi addes.
Isicia de pavo primum locum habent ita si fricta fiunt, ut callum vincant. item secuncum habent de cuniclis, quartum locum habent de pullis, item quintum locum habent de porcello tenero.
Isicia multa ab alieno sic facies: teres piper, ligisticum, origanum, modicum silfi, gingiber minimum, mellis modicum. liquamine temperabis, misces, adicies super isicia. facies ut ferveat. cum bene bullierit, amolo obligas spisso et surbendum inferes.
Amolum aliter: piper teres pridie infusu, cui subinde liquamen suffundes ita ut bene tritum ac lutulentum facias piperatum. cui defrictum admiscis quod fit de cotoniis, quod Romani colorem vocant, ac deinceps amolum infusum adicies vel orizae sucum. et lento igni fervere facias amolatum.
Aliter: ossucla depolis. exbromas, deinde mittis in caccabum porros, anetum, salem. cum cocta fuerint, adicies piper, api semen, deinde oridiam infusam, teres, addes liquamen et passum vel defrictum. omnia misces et cum isiciis inferes.
Apoderinum sic facies: alica elixa, nucleis et amigdalis depellatis et in aqua infusis et lotis ex creta argentaria, ut ad candorem pariter perducantur, ciminum, ammi ammiscebis, uvam passam, caroenum vel passum, desuper confractum aspargis et in boletari inferes.
Vulvulae isiciata sic fiunt: piper tritum et ciminum, capita porrorum brevia duo ad molle purgata, ruta, liquamen, admiscentur pulpae bene tunsae et fricatae, denuo ipso subtrito ita ut conmisceri possit, mittas piperis grana et nuclei et calcabis in matrice bene lota. et sic coquuntur ex aequa oleo, liquamine, fasciculo porrorum et aneto.
Botellum sic facies: sex ovi vitellis coctis, nucleis pineis concisis cepam, porrum concisum, tus, crudum misces, piper minutum. et sic intestinum farcies. adicies liquamen et vinum et sic coques.
Lucanicas similiter, ut supra scriptum est [lucanicarum confectio]. teritur piper, ciminum, satureia, ruta, petrosilinum, condimentum, bacae lauri, liquamen et admiscetur pulpa bene tunsa, ita ut denuo bene cum ipso subtrito fricetur cum liquamine. admixto pipere integro et abundanti pinguedine et nucleis inicies in intestinum perquam tenuatum [perductum] et sic ad fumum suspenditur.
Farcimina: ova et cerebella teres, nucleos pineos, piper, liquamen, lasar modicum et his intestinum implebis. elixas, postea assas et inferes.
Aliter: coctam alicam et tritam cum pulpa concisa et trita una cum pipere et liquamine et nucleis. farcies intestinum et elixabis, deinde comino, sale assabis et cum sinapi inferes, vel sic concisum in disco.
Aliter: alicam purgas et cum liquamine intestini et albamine porri concisi minutatim simul elixas. elixa tolles, pinguedinem concides et copadia pulpae, in se omnia conmisces. teres piper, ligisticum, ova tria, haec omnia in mortario permisces cum nucleis et pipere integro, liquamen suffundes. intestinam inples, elixam et subassas, vel elixam tantum appones.
Aliter circellos isiciatos: reples intestinum inpensa isicii et circellum facies rotundum. fumas. cum miniaverit, subassas, exornas, oenogaro faecinio perfundes, sed ciminum addes. Incipit Apici Caeli cepuros [de holeribus].