Pistoclervs
Quid istuc? quae istaec est pulsatio?
[gap] quae te mala crux agitat, quí ad istunc modum
alieno viris tuas extentes ostio?
fores paene exfregisti. quid nunc vis tibi?
Parasitvs
Adulescens, salve.
Pistoclervs
Salve. sed quem quaeritas?
Parasitvs
Bacchidem.
Pistoclervs
Vtram ergo?
Parasitvs
Nil scio nisi Bacchidem.
paucis: me misit miles ad eam Cleomachus,
vel ut ducentos Phílippos reddat aureos
vel ut hinc in Elatiam hodie eat secum semul.
Pistoclervs
Non it. negat se ituram. abi et renuntia.
alium illa amat, non illum. duc te ab aedibus.
Parasitvs
Nimis iracunde.
Pistoclervs
At scin quam iracundus siem?
ne tíbi hercle haud longe est os ab infortunio,
ita dentifrangibula haec meis manibus gestiunt.
Parasitvs
Cum ego huius verba interpretor, mihi cautiost,
ne nucifrangibula excussit ex malis meis.
tuo ego istaec igitur dicam illi periculo.
Pistoclervs
Quid ais tu?
Parasitvs
Ego istuc illi dicam.
Pistoclervs
Dic mihi,
quis tu es?
Parasitvs
Illius sum integumentum corporis.
Pistoclervs
Nequam esse oportet cui tu integumentum improbu's.
Parasitvs
Sufflatus ille huc veniet.
Pistoclervs
Dirrumptum velim.
Parasitvs
Numquid vis?
Pistoclervs
Abeas. celeriter factost opus.
Parasitvs
Vale, dentifrangibule.—
Pistoclervs
Et tu, integumentum, vale.
in eum nunc haec res vénit locum, ut quid consili
dem meo sodali super amica nesciam,
qui iratus renumeravit omne aurum patri,
neque nummus ullust qui reddatur militi.
sed huc concedam, nam concrepuerunt fores.
Mnesilochus eccum maestus progreditur foras.