Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
T. Maccius Plautus · Pseudolus

Act 5, Scene 2

Text kindly provided by Perseus

Simo
Vóx viri péssumi me éxciet foras.
séd quid hoc? quó modo? quíd video ego?
Psevdolvs
Cúm corona ébrium Pseúdolum tuom.
Simo
Líbere hercle hóc quidem. séd vide statum.
núm mea grátia pértimescít magis?
cógito, saéviter blanditerne ádloquar.
sed me hóc votat vim fácere nunc
quód fero, sí qua in hoc spés sitast mihi.
Psevdolvs
Vír malus viro óptumo obviam it.
Simo
Dí te ament, Pseúdole. fú i in malám crucem.
Psevdolvs
Cur égo adflictor?
Simo
Quid tú, malum, in os igitúr mi ebrius inrúctas?
Psevdolvs
Mólliter síc tene mé, cave né cadam:
non vídes me ut madide mádeam?
Simo
Quae ístaec audáciast, té sic intérdius
cúm corolla ébrium incédere?
Psevdolvs
Lubet.
Simo
Quíd, lubet? pérgin ructáre in os mihi?
Psevdolvs
Suávis ructús mihi est. síc sine, Simo.
Simo
Credo équidem potesse té, scelus,
Mássici móntis ubérrumos quáttuor
frúctus ebíbere in hora úna.
Psevdolvs
Hiberna áddito.
Simo
Hau mále mones, sed díc tamen,
únde onustám celocem ágere te praédicem?
Psevdolvs
Cúm tuo fílio pérpotaví modo.
séd, Simo, ut probe táctus Ballio est!
quaé tibi díxi, ut effécta reddidi!
Simo
Péssumu’s homo.
Psevdolvs
Mulier haec facit.
cúm tuo fílio líbera accubat.
Simo
ómnia, ut quícque egisti, órdine scio.
Psevdolvs
Quíd ergo dubitas dáre mi argentum?
Simo
Iús petis, fateór. tene.
Psevdolvs
át negabás daturum ésse te mihi.
onera húnc hominem atque me cónsequere hac.
Simo
Egone ístum onerém?
Psevdolvs
Onerábis, scio.
Simo
Quid ego huíc homini faciám? satin ultro et argéntum aufert et me ínridet?
Psevdolvs
Vae víctis.
Simo
Vorte ergo úmerum.
Psevdolvs
Simo
Hóc ego numquam rátus sum
fore me, út tibi fierem súpplex.
heu heú heu.
Psevdolvs
Desine.
Simo
Dóleo.
Psevdolvs
Ni doléres tu, ego dolérem.
Simo
Quid? hoc aúferen, Pseudole mi, aps tuo ero?
Psevdolvs
Lubentíssimo corde atque ánimo.
Simo
Non aúdes, quaeso, aliquám partem mihi grátiam facere hinc árgenti?
Psevdolvs
Non: mé dices avidum ésse hominem nam hinc númquam eris nummo dívitior;
neque té mei tergi mísereret, si hoc nón hodie ecfecíssem.
Simo
Erit úbi te ulciscar, sí vivo.
Psevdolvs
Quid mínitare? habeo térgum.
Simo
Age sáne igitur.
Psevdolvs
Simo
Quíd redeam?
Psevdolvs
Redi módo: non eris decéptus.
Simo
Redeó.
Psevdolvs
Simul mecum i pótatum.
Simo
Egone éam?
Psevdolvs
Fac quod te iúbeo:
si is, aút dimidium aut plús etiam faxo hínc feres.
Simo
Eo, duc mé quo vis.
Psevdolvs
Quid núnc? numquid íratus és aut mihi aút filió propter hás res, Simó?
Simo
Nil profécto.
Psevdolvs
I hac.
Ballio
Té sequor. quín vocas spéctatorés simul?
Psevdolvs
Hércle me isti haú solent
vocáre, neque ergo ego ístos;
vérum si vóltis adplaúdere atque ádprobare
húnc gregem et fábulam,
in crástinum vos vocábo.

Reader settings

Side Panel

Text SizeRelative to your text size
85%

Textual Aids

Touch Navigation