Daemones
Vtrum tu, leno, cum malo lubentius
quiescis an sic sine malo, si copiast?
Labrax
Ego quae tu loquere flocci non facio, senex.
meas quidem te invito et Venere et summo Iove
de ara capillo iam deripiam.
Daemones
Tange dum.
Labrax
Tangam hercle vero.
Daemones
Agedum ergo, accede huc modo.
Labrax
Iube dúm recedere istos ambo illuc modo.
Daemones
Immo ad te accedent.
Labrax
Non hercle equidem censeo.
Daemones
Quid ages, si accedent propius?
Labrax
Ego recessero.
verum, senex, si te umquam in urbe offendero,
numquam hercle quisquam me lenonem dixerit,
si te non ludos pessimos dimisero.
Daemones
Facito istuc quod minitare; sed nunc interim,
si illas attigeris, dabitur tibi magnum malum.
Labrax
Quam magnum vero?
Daemones
Quantum lenoni sat est.
Labrax
Minacias ego flocci non faciam tuas,
equidem has te invito iam ambas rapiam.
Daemones
Tange dum.
Labrax
Tangam hercle vero.
Daemones
Tanges, at scin quo modo?
i dum, Turbalio, curriculo, adferto domo
duas clávas.
Labrax
Clavas?
Daemones
Sed probas. propera cito.
ego te hodie faxo recte acceptum, ut dignus es.
Labrax
Eheu, scelestus galeam in navi perdidi;
nunc mi opportuna hic esset, salva si foret.
licet saltem istas mi appellare?
Daemones
Non licet.
ehem, optime edepol eccum clavator ádvenit.
Labrax
Illud quidem edepol tinnimentum est auribus.
Daemones
Age accipe illinc alteram clavam, Sparax.
age, alter istinc, alter hinc adsistite.
adsistite ambo. sic. audite nunciam:
si hercle illic illas hodie digito tetigerit
invitas, ni istunc istis invitassitis
usque adeo donec qua domum abeat nesciat,
periistis ambo. si appellabit quempiam,
vos respondetote istinc istarum vicem;
sin ipse abire hínc volet, quantum potest
extemplo amplectitote crura fustibus.
Labrax
Etiam me abire hinc non sinent?
Daemones
Dixi satis.
et ubi ille servos cúm ero huc advenerit,
qui erum accersivit, itote extemplo domum.
curate haec sultis magna diligentia.—
Labrax
Heu hercle, ne istic fana mutantur cito:
iam hoc Herculi est, Veneris fanum quod fuit,
ita duo destituit signa hic cum clavis senex.
non hercle quo hinc nunc gentium aufugiam scio,
ita nunc mi utrumque saevit, et terra et mare.
Palaestra.
Lorarius
Quid vis?
Labrax
Apage, controversia est,
haec quidem Palaestra, quae respondit, non mea est.
heus, Ampelisca.
Lorarius alter
Cave sis infortunio.
Labrax
Vltro te. signa ut homines satis recte monent.
sed vobis dico, heús vos, num molestiaest,
me adire ad illas propius?
Lorarius
Nil nobis quidem.
Labrax
Numquid molestum mihi erit?
Lorarius
Nil, si caveris.
Labrax
Quid est quod caveam?
Lorarius
Em, a crasso infortunio.
Labrax
Quaeso hercle, abire ut liceat.
Lorarius
Abeas, si velis.
Labrax
Bene hercle factum. habeo vobis gratiam.
[non] accedam potius.
Lorarius
Illic astato ilico.
Labrax
Edepol proveni nequiter multis modis.
certumst hasce hodie usque obsidione vincere.