Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
T. Maccius Plautus · Rudens

Act 2, Scene 6

Text kindly provided by Perseus

Labrax
Qui homo sese miserum et mendicum volet,†
Neptuno credat sese atque aetatem suam:
nam si quis cúm eo quid rei commiscuit,
ad hoc exemplum amittit ornatum domum.
edepol, Libertas, lepida es, quae numquam pedem
voluisti in navem cum Hercule una imponere.
sed ubi ille meus est hospes, qui me perdidit?
atque eccum incedit.
Charmides
Quo malum properas, Labrax?
nam equidem te nequeo consequi tam strenue.
Labrax
Vtinam te prius quam óculis vidissem meis,
malo cruciatu in Sicilia perbiteres,
quem propter hoc mihi optigit misero mali.
Charmides
Vtinam, quom in aedis me ad te adduxisti tuas,
in carcere illo potius cubuissem die.
deosque ímmortales quaeso, dum vivas uti
omnes tui símiles hospites habeas tibi.
Labrax
Malam fortunam in aedis te adduxi meas.
quid mihi scelesto tibi erat auscultatio,
quidve hinc abitio quidve in navem inscensio?
ubi perdidi etiam plus boni quam mihi fuit.
Charmides
Pol minime miror, navis si fractast tibi,
scelus te ét sceleste parta quae vexit bona.
Labrax
Pessum dedisti me blandimentis tuis.
Charmides
Scelestiorem cenam cenavi tuam,
quam quae Thyestae quondam aut posita est Tereo.
Labrax
Perii, animo male fit. contine quaeso caput.
Charmides
Pulmoneum edepol nimis velim vomitum vomas.
Labrax
Eheu, Palaestra atque Ampelisca, ubi estis nunc?
Charmides
Piscibus in alto, credo, praebent pabulum.
Labrax
Mendicitatem mi optulisti opera tua,
dum tuis ausculto magnidicis mendaciis.
Charmides
Bonam est quod habeas gratiam merito mihi,
qui te ex insulso salsum feci opera mea.
Labrax
Quin tu hinc is a me in maxumam malam crucem?
Charmides
Eas. easque res agebam commodum.
Labrax
Eheu, quis vivit me mortalis miserior?
Charmides
Ego multo tanto miserior quam tu, Labrax.
Labrax
Charmides
Quia ego indignus sum, tu dignus qui sies.
Labrax
O scirpe, scirpe, laudo fortunas tuas,
qui semper servas gloriam aritudinis.
Charmides
Equidem me ad velitationem exerceo,
nam omnia corusca prae temore fabulor.
Labrax
Edepol, Neptune, es balineator frigidus:
cum vestimentis postquam aps té abii, algeo.
Charmides
Ne thermipolium quidem ullum ínstruit,
ita salsam praehibet potionem et frigidam.
Labrax
Vt fortunati sunt fabri ferrarii,
qui apud carbones adsident: semper calent.
Charmides
Vtinam fortuna nunc anetina úterer,
ut quom exiissem éx aqua, arerem tamen.
Labrax
Quid si aliquo ad ludos me pro manduco locem?
Charmides
Quapropter?
Labrax
Quia pol clare crepito dentibus.
Charmides
Iure optumo me élavisse árbitror.
Labrax
Charmides
Qui una auderem tecum in navem ascendere,
qui a fundamento mi usque movisti mare.
Labrax
Tibi auscultavi, tu promittebas mihi
illi esse quaestum maximum meretricibus,
ibi me conruere posse aiebas ditias.
Charmides
Iam postulabas te, impurata belua,
totam Siciliam devoraturum insulam?
Labrax
Quaenam ballaena meum voravit vidulum,
aurum atque argentum ubi omne compactum fuit?
Charmides
Eadem illa, credo, quae meum marsuppium,
quod plenum argenti fuit in sacciperio.
Labrax
Eheu, redactus sum usque ad unam hanc tuniculam
et ad hoc misellum pallium. perii oppido.
Charmides
Vel consociare mihi quidem tecum licet:
aequas habemus partes.
Labrax
Saltem si mihi
mulierculae essent salvae, spes aliquae forent.
nunc si me adulescens Plesidippus viderit,
quo ab arrabonem pro Palaestra acceperam,
iam is exhibebit hic mihi negotium.
Charmides
Quid, stulte, ploras? tibi quidem edepol copiast,
dum lingua vivet, qui rem solvas omnibus.

Reader settings

Side Panel

Text SizeRelative to your text size
85%

Textual Aids

Touch Navigation