Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Poem 1§ 1 Poem 2§ 2 Poem 3§ 3 Poem 4§ 4 Poem 5§ 5 Poem 6§ 6 Poem 7§ 7
Calpurnius Siculus · Eclogues

Poem 5

Text kindly provided by Hypotactic

Forte Micōn senior Canthusque, Micōnis alumnus,
torrentem patulā vītābant īlice sōlem,
cum juvenī senior praecepta datūrus alumnō
tālia verba refert tremulīs titubantia labrīs:
"quās errāre vidēs inter dūmēta capellās
cānaque lascīvō concīdere grāmina morsū,
Canthe puer, quōs ecce gregēs ā monte remōtōs
cernis in aprīcō dēcerpere grāmina campō,
hōs tibi dō senior juvenī pater: ipse tuendōs
accipe. jam certē potes īnsūdāre labōrī,
jam prō mē gnāvam potes exercēre juventam.
Adspicis ut nōbīs aetās jam mīlle querēlās
afferat et baculum premat inclīnāta senectūs?
sed quā lēge regās et amantēs lustra capellās
et melius prātīs errantēs mollibus agnās,
percipe. vēre novō, cum jam tinnīre volucrēs
incipient nīdōsque reversa lutābit hirundō,
prōtinus hībernō pecus omne movēbis ovīlī.
tunc etenim melior vernantī germine silva
pullat et aestīvās reparābilis incohat umbrās,
tunc flōrent saltūs viridisque renāscitur annus,
tunc Venus et calidī scintillat fervor amōris
lascīvumque pecus salientēs accipit hircōs.
sed nōn ante gregēs in pāscua mitte reclūsōs,
quam fuerit plācāta Palēs. tum cespite vīvō
pōne focum geniumque locī Faunumque Larēsque
salsō farre vocā; tepidōs tunc hostia cultrōs
imbuat: hāc etiam, dum vīvit, ovīlia lustrā.
nec mora, tunc campōs ovibus, dūmēta capellīs
ortō sōle dabis, simul hunc trānscendere montem
coeperit ac prīmae spatium tepefēcerit hōrae.
at sī forte vacēs, dum mātūtīna relaxat
frīgora sōl, tumidīs spūmantia mulctra papillīs
implēbit quod māne fluet; rūrsusque premētur
māne quod occiduae mulsūra redēgerit hōrae.
parce tamen fētīs: nē sint compendia tantī,
dēstruat ut niveōs vēnālis cāseus agnōs;
nam tibi praecipuō fētūra colētur amōre.
tē quoque nōn pudeat, cum sērus ovīlia vīsēs,
sī qua jacēbit ovis partū resolūta recentī,
hanc umerīs portāre tuīs nātōsque tepentī
ferre sinū tremulōs et nōndum stāre parātōs.
nec tū longinquās procul ā praesēpibus herbās
nec nimis āmōtae sectābere pābula silvae,
dum peragit vernum Jovis incōnstantia tempus.
vēris enim dubitanda fidēs: modo fronte serēnā
blandius arrīsit, modo cum cālīgine nimbōs
intulit et miserās torrentibus abstulit agnās.
At cum longa diēs sitientēs afferet aestūs
nec fuerit variante deō mūtābile caelum,
jam silvīs committe gregēs, jam longius herbās
quaere; sed ante diem pecus exeat: ūmida dulcēs
efficit aura cibōs, quotiēns fugientibus eurīs
frīgida nocturnō tanguntur pāscua rōre
et mātūtīnae lūcent in grāmine guttae.
at simul argūtae nemus increpuēre cicādae,
ad fontem compelle gregēs; nec prōtinus herbās
et campōs permitte sequī, sed prōtegat illōs
intereā veterēs quae porrigit aesculus umbrās.
vērum ubi dēclīnī jam nōna tepēscere sōle
incipiet sēraeque vidēbitur hōra merendae,
rūrsus pāsce gregēs et opācōs dēsere lūcōs.
nec prius aestīvō pecus inclūdātur ovīlī,
quam levibus nīdīs somnōs captāre volūcris
cōgitet et tremulō queribunda fritinniat ōre.
Cum jam tempus erit mātūrās dēmere lānās,
sūcida jam teretī cōnstringere vellera juncō,
hircōrumque jubās et olentēs caedere barbās,
ante tamen sēcerne pecus gregibusque notātīs
cōnsimilēs inclūde comīs, nē longa minūtīs,
mollia nē dūrīs coeant, nē candida fuscīs.
sed tibi cum vacuās positō vēlāmine costās
dēnūdāvit ovis, circumspice, nē sit acūtā
forpice laesa cutis, tacitum nē pustula vīrus
tēxerit occultō sub vulnere: quae nisi ferrō
rumpitur, ā! miserum fragilī rūbīgine corpus
arrōdet saniēs et putria contrahet ossa.
prōvidus (hoc moneō) vīventia sulphura tēcum
et scillae caput et vīrōsa bitūmina portēs,
vulneribus lātūrus opem; nec Bruttia dēsit
pix tibi: tū liquidō picis unguine terga mementō,
sī sint rāsa, linās. vīvī quoque pondera melle
argentī coquitō lentumque bitūmen ahēnō,
impressūrus ovī tua nōmina; nam tibi lītēs
auferet ingentēs lēctus possessor in armō.
Nunc etiam, dum siccus ager, dum fervida tellūs,
dum rīmōsa palūs et multō torrida līmō
aestuat et fragilēs nimium sōl pulverat herbās,
lūrida conveniet succendere galbana sēptīs
et tua cervīnō lūstrāre mapālia fūmō.
obfuit ille malīs odor anguibus: ipse vidēbis
serpentum cecidisse minās: nōn stringere dentēs
ūlla potest uncōs, sed inānī dēbilis ōre
marcet et obtūsō jacet exarmāta venēnō.
Nunc age vīcīnae circumspice tempora brūmae
quā ratiōne gerās. aperit cum vīnea sēpēs
et portat lēctās sēcūrus circitor ūvās,
incipe falce nemus vīvāsque recīdere frondēs.
nunc opus est tenerās summātim stringere virgās,
nunc hiemī servāre comās, dum permanet ūmor,
dum viret et tremulās nōn excutit Āfricus umbrās.
hās tibi conveniet tepidīs fēnīlibus ōlim
prōmere, cum pecudēs extrēmus clauserit annus.
hāc tibi nītendum est, labor hic in tempore noster,
gnāvaque sēdulitās redit et pāstōria virtūs.
nē pigeat rāmōs siccīs miscēre recentēs
et sūcōs adhibēre novōs, nē torrida nimbīs
īnstet hiems nimiōque gelū nivibusque coāctīs
incursāre vetet nemus et cōnstringere frondēs;
tū tamen aut lēvēs hederās aut molle salictum
valle premēs mediā. sitis est pēnsanda tuōrum,
Canthe, gregum viridante cibō: nihil āridus illīs,
ingentī positus quamvīs strue, prōsit acervus.
virgea sī dēsint liquidō turgentia sūcō
et quibus est aliquid plēnae vītāle medullae.
praecipuē gelidum stipulā cum fronde cadūcā
sterne solum, nē forte rigor penetrābile corpus
ūrat et internō vastet pecuāria morbō.
Plūra quidem meminisse velim, nam plūra supersunt.
sed jam sēra diēs cadit et jam sōle fugātō
frīgidus aestīvās impellit Noctifer hōrās."

Reader settings

Side Panel

Text SizeRelative to your text size
85%

Textual Aids

Touch Navigation