Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
T. Maccius Plautus · Persa

Act 3, Scene 3

Text kindly provided by Perseus

Toxilvs
Curate isti intus, iam égo domum me recipiam.
Dordalvs
Toxile, quid agitur?
Toxilvs
Oh, lutum lenonium,
commixtum caeno sterculinum publicum,
impure, inhoneste, iniure, inlex, labes popli,
pecuniae accípiter avide atque invide,
procax, rapax, trahax—trecentis versibus
tuas ímpuritias traloqui nemo potest—
accipin argentum? accipe sis argentum, impudens,
tené sis argentum, etiam tu argentum tenes?
possum te facere ut argentum accipias, lutum?
non mihi censebas copiam argenti fore,
qui nisi iurato mihi nil ausu's credere?
Dordalvs
Sine respirare me, ut tibi respondeam.
vir summe populi, stabulum servitutium,
scortorum liberator, suduculum flagri,
compedium tritor, pistrinorum civitas,
perenniserve, lurco, edax, furax, fugax,
cedo sis mi argentum, da mihi argentum, impudens,
possum a te exigere argentum? argentum, inquam, cedo,
quin tu mi argentum reddis? nilne te pudet?
leno te argentum poscit, solida servitus,
pro liberanda amica, ut omnes audiant.
Toxilvs
Tace, obsecro hercle. ne tua vox valide valet.
Dordalvs
Referundae ego habeo linguam natam gratiae.
eodém mihi pretio sal praehibetur quo tibi.
nisi me haec defendet, numquam delinget salem.
Toxilvs
Iam omitte iratus esse. id tibi suscensui,
quia te negabas credere argentum mihi.
Dordalvs
Mirum quin tibi ego crederém, ut idem mihi
faceres quod partim faciunt argentarii:
ubi quid credideris, citius extemplo a foro
fugiunt quam ex porta ludis cum emissust lepus.
Toxilvs
Cape hoc sis.
Dordalvs
Quin das?
Toxilvs
Nummi sescenti hic erunt,
probi, numerati. fac sit mulier libera,
atque huc continuo adduce.
Dordalvs
Iam faxo hic erit.
non hercle, quoi nunc hoc dem spectandum, scio.
Toxilvs
Fortasse metuis in manum concredere?
Dordalvs
Mirum quin [gap] [citius iam a foro argentarii]
[abeunt, quam in cursu rotula circumvortitur.]
Toxilvs
Abi istác travorsis angiportis ad forum;
eadem ístaec facito mulier ad me transeat
per hortum.
Dordalvs
Iam hic faxo aderit.
Toxilvs
At ne propalam.
Dordalvs
Sapienter sane.
Toxilvs
Supplicatum cras eat.
Dordalvs
Ita hercle vero.—
Toxilvs
Dum stas, reditum oportuit.

Reader settings

Side Panel

Text SizeRelative to your text size
85%

Textual Aids

Touch Navigation