Leaena
Flós veteris vini meis náribus obiectust,
éius amor cupidam me huc prólicit per tenebras.
ubi ubi ést, prope me est. euáx, habeo.
salve, ánime mi, Líberi lepos.
ut véteris vetus tui cúpida sum.
nam ómnium unguéntum odor praé tuo naútea est,
tú mihi stácta, tu cínnamum, tú rosa,
tú crocinum et casia es, tu télinum,
nam ubi tú profusu's, íbi ego me pérvelim sepultam.
séd quom adhuc náso odos óbsecutúst meo,
da vicissim meo gutturi gaudium.
nil ago tecum: ubi est ipsus? ipsum expeto
tangere, invergere in me liquores tuos,
sine, ductim. sed hac abiit, hac persequar.
Phaedromvs
Sitit haéc anus.
Palinvrvs
Quantillúm sitit?
Phaedromvs
Modica ést, capit quadrántal.
Palinvrvs
Pol ut praédicas, vindémia [haec] huic ánui non sat est sóli.
canem esse hánc quidem magis pár fuit: sagax násum habet.
Leaena
Amábo,
cúia vox sonát procul?
Phaedromvs
Cénseo hanc áppellandam anum.
adíbo. redi ét respice ád me, Leaéna.
Leaena
Imperatór quis est?
Phaedromvs
Vínipollens lépidus Liber,
tibí qui screánti, siccaé, semisómnae
adfért potiónem et sitím iam sedátum it.
Leaena
Quám longe a me abest?
Phaedromvs
Lúmen hoc vide.
Leaena
Grándiorém gradum ergó fac ad me, óbsecro.
Phaedromvs
Sálve.
Leaena
Egon sálva sim, quaé siti sícca sum?
Phaedromvs
At iám bibes.
Leaena
Diu fit.
Phaedromvs
Ém tibi anus lepida.
Leaena
Sálve, oculissime homo.
Palinvrvs
Age, effúnde hoc cito in barathrúm, propere
prolúe cloacam.
Phaedromvs
Tace. Nólo huic male dicí.
Palinvrvs
Faciam igitur mále potius.
Leaena
Venús, de paulo paúlulum hoc tíbi dabo haud lubénter.
nam tíbi amantes própitiantes vínum potantés danunt
omnés, mihi haud saepe évenunt talés hereditátes.
Palinvrvs
Hoc víde ut ingurgitat ímpura in se mérum avariter, faucíbus plenis.
Phaedromvs
Perii hércle, huic quid primúm dicam nesció.
Palinvrvs
Em istuc, quod míhi dixti.
Phaedromvs
Quid id ést?
Palinvrvs
Periisse ut té dicas.
Phaedromvs
Male tibi di faciant.
Palinvrvs
Díc isti.
Leaena
Ah.
Palinvrvs
Quíd est? ecquid lubet?
Leaena
Lúbet.
Palinvrvs
Etiam mihi quóque stimulo foderé lubet te.
Phaedromvs
Tace, né—
Palinvrvs
Noli, taceo. écce autem bibit árcus, pluet credo hércle hodie.
Phaedromvs
Iamne égo huic dico?
Palinvrvs
Quid díces?
Phaedromvs
Me periísse.
Palinvrvs
Age dice.
Phaedromvs
Anus, aúdi.
hóc volo scíre te: pérditus súm miser.
Leaena
At pól ego oppidó servata.
séd quid est? quid lubet pérditum dícere
te essé?
Phaedromvs
Quia id quod amo cáreo.
Leaena
Phaedrome mi, ne plora amabo.
tu mé curato né sitiam, ego tibi quód amas iam huc addúcam.—
Phaedromvs
Tibine égo, si fidem servás mecum, vineám pro aurea statuá statuam,
quae tuó gutturí sit monumentum.
qui me ín terra aeque fórtunatus erít, si illa ad me bítet,
Palinúre?
Palinvrvs
Edepol qui amát, si eget, misera ádficitur, ere, aerúmna.
Phaedromvs
Non íta res est, nam cónfido parasítum hodie adventúrum
cum argénto ad me.
Palinvrvs
Magnum ínceptas, si id éxpectas quod núsquamst.
Phaedromvs
Quid si ádeam ad fores atque óccentem?
Palinvrvs
Si lúbet, neque veto neque iúbeo,
quando égo te video immútatis moribus esse, ere, atque ingénio.
Phaedromvs
Péssuli, heus péssuli, vós salutó lubens,
vos amo, vos volo, vos peto atque obsecro,
gérite amantí mihi mórem, amoeníssumi,
fite causa mea ludii barbari,
sussilite, obsecro, et mittite istanc foras,
quae mihi misero amanti ebibit sanguinem.
hoc vide ut dormiunt pessuli pessumi
nec mea gratia commovent se ocius.
re spicio, nihili meam vos gratiam facere.
st tace, tace.
Palinvrvs
Taceo hercle equidem.
Phaedromvs
Sentio sonitum.
tandem edepol mihi morigeri pessuli fiunt.