Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Lines 1–124§ 1
Appendix Vergiliana · Moretum

Lines 1–124

Text kindly provided by Perseus

Moretum

Iam nox hibernas bis quinque peregerat horas

excubitorque diem cantu praedixerat ales,

Simylus exigui cultor cum rusticus agri,

tristia uenturae metuens ieiunia lucis,

membra leuat uili sensim demissa grabato

sollicitaque manu tenebras explorat inertis

uestigatque focum, laesus quem denique sensit.

paruulus exusto remanebat stipite fumus

et cinis obductae celabat lumina prunae.

admouet his pronam summissa fronte lucernam

et producit acu stuppas umore carentis,

excitat et crebris languentem flatibus ignem.

tandem concepto, sed uix, fulgore recedit,

oppositaque manu lumen defendit ab aura,

et reserat plausa quae pervidet ostia claui.

fusus erat terra frumenti pauper aceruus:

hinc sibi depromit, quantum mensura patebat,

quae bis in octonas excurrit pondere libras.

Inde abit adsistitque molae parvaque tabella,

quam fixam paries illos seruabat in usus,

lumina fida locat. geminos tum ueste lacertos

liberat et cinctus uillosae tegmine caprae

peruerrit cauda silices gremiumque molarum.

aduocat inde manus operi, partitus utrimque:

laeua ministerio, dextra est intenta labori.

haec rotat assiduum gyris et concitat orbem,

tunsa Ceres silicum rapido decurrit ab ictu.

interdum fessae succedit laeua sorori

alternatque vices. modo rustica carmina cantat

agrestique suum solatur uoce laborem,

interdum clamat Scybalen. erat unica custos,

Afra genus, tota patriam testante figura,

torta comam labroque tumens et fusca colore,

pectore lata, iacens mammis, compressior aluo,

cruribus exilis, spatiosa prodiga planta.

[continuis rimis calcanea scissa rigebant.]

hanc vocat atque arsura focis imponere ligna

imperat et flamma gelidos adolere liquores.

Postquam impleuit opus iustum uersatile finem,

transfert inde manu fusas in cribra farinas

et quatit, ac remanent summo purgamina dorso.

subsidit sincera foraminibusque liquatur

emundata Ceres. leui tum protinus illam

componit tabula, tepidas super ingerit undas,

contrahit admixtas nunc frondes atque farinas:

transuersat durata manu, liquidoque coacto

interdum grumos spargit sale, iamque subactum

leuat opus, palmisque suum dilatat in orbem,

et notat impressis aequo discrimine quadris.

infert inde foco (Scybale mundauerat aptum

ante locum) testisque tegit, super aggerat ignis.

dumque suas peragit Vulcanus Vestaque partes,

Simylus interea uacua non cessat in hora,

uerum aliam sibi quaerit opem, neu sola palato

sit non grata Ceres, quas iungat comparat escas.

non illi suspensa focum carnaria iuxta,

durati sale terga suis truncique, vacabant,

traiectus medium sparto sed caseus orbem

et uetus astricti fascis pendebat anethi.

ergo aliam molitur opem sibi prouidus heros.

Hortus erat iunctus casulae, quem uimina pauca

et calamo rediuiua leui munibat harundo,

exiguus spatio, uariis sed fertilis herbis.

nil illi derat quod pauperis exigit usus;

interdum locuples a paupere plura petebat.

nec sumptus erat illud opus, sed recula curae:

si quando uacuum casula pluuiaeue tenebant

festaue lux, si forte labor cessabat aratri,

horti opus illud erat. uarias disponere plantas

norat et occultae committere semina terrae

uicinosque apte circa summittere riuos.

hic holus, hic late fundentes bracchia betae

fecundusque rumex maluaeque inulaeque uirebant,

hic siser et nomen capiti debentia porra,

[hic etiam nocuum capiti gelidumque papauer,]

grataque nobilium requies lactuca ciborum,

[gap] crescitque in acumina radix,

et grauis in latum demissa cucurbita uentrem.

uerum hic non domini (quis enim contractior illo?)

sed populi prouentus erat, nonisque diebus

uenalis umero fascis portabat in urbem:

inde domum cervice leuis, grauis aere redibat,

uix umquam urbani comitatus merce macelli.

caepa rubens sectique famem domat area porri,

quaeque trahunt acri uultus nasturtia morsu,

intibaque et Venerem reuocans eruca morantem.

Tunc quoque tale aliquid meditans intrauerat hortum.

ac primum leuiter digitis tellure refossa

quattuor educit cum spissis alia fibris;

inde comas apii gracilis rutamque rigentem

uellit et exiguo coriandra trementia filo.

haec ubi collegit, †laetum† consedit ad ignem

et clara famulam poscit mortaria uoce.

singula tum capitum nodoso †corpore† nudat

et summis spoliat coriis contemptaque passim

spargit humi atque abicit. servatum gramine bulbum

tingit aqua lapidisque cauum dimittit in orbem.

his salis inspargit micas, sale durus adesso

caseus adicitur, dictas super interit herbas,

et laeua uestem saetosa sub inguina fulcit.

dextera pistillo primum fraglantia mollit

alia, tum pariter mixto terit omnia suco.

it manus in gyrum: paulatim singula uiris

deperdunt proprias, color est e pluribus unus,

nec totus uiridis, quia lactea frusta repugnant,

nec de lacte nitens, quia tot uariatur ab herbis.

saepe uiri naris acer iaculatur apertas

spiritus et simo damnat sua prandia uultu,

saepe manu summa lacrimantia lumina terget

immeritoque furens dicit conuicia fumo.

procedebat opus: non iam salebrosus, ut ante,

sed grauior lentos ibat pistillus in orbis.

ergo Palladii guttas instillat oliui

exiguique super uiris infundit aceti,

atque iterum commiscet opus mixtumque retractat.

tum demum digitis mortaria tota duobus

circuit inque globum distantia contrahit unum,

constet ut effecti species nomenque moreti.

eruit interea Scybale quoque sedula panem:

quem tertis recipit manibus, pulsoque timore

iam famis, inque diem securus Simylus illam,

ambit crura ocreis paribus, tectusque galero

sub iuga parentis cogit lorata iuvencos,

atque agit in segetes et terrae condit aratrum.

Reader settings

Side Panel

Text SizeRelative to your text size
85%

Textual Aids

Touch Navigation